Sunday, 9 June 2013

Coppersmit barbet


COPPERSMITH BARBET-Megalaima haemacephala
ಕೊಪ್ಪರಸ್ಮಿತ್  ಬಾರ್ಬೆಟ್ - ಚಿಟ್ಟ  ಗುಟುರ್ -


ಹಕ್ಕಿಯ ಮುಂಭಾಗ

ಮಾವಿನ ಟೊಂಗೆಯಲ್ಲಿ ಕುಳಿತ ಗಂಡು ಮತ್ತು ಹೆಣ್ಣು ಹಕ್ಕಿ

ಕಪ್ಪುಮಿಶ್ರೀತ ಎಲೆಹಸಿರು ಹಿಂಭಾಗ


       1 7 ಸೆಂ.ಮೀ. ಉದ್ದದ ಗುಬ್ಬಿ ಗಾತ್ರದ ದುಂಡಗಿನ ಹಕ್ಕಿ. ಹಸಿರುಹುಲ್ಲು ಬಣ್ಣ. ಮುಂದೆಲೆ, ಎದೆಯಮೇಲೆ ಕುಂಕುಮ ಬಣ್ಣದ ಪಟ್ಟೆ ಇದೆ. ಎದೆ, ಕುತ್ತಿಗೆ ಕೆಳಗೆ, ಕಣ್ಣಿನ ಮೇಲೆ ಕೆಳಗೆ ಹಳದಿ ಬಣ್ಣ .ಹಳದಿಬಣ್ಣದ ಎದೆಯಮೇಲೆ ಹಸಿರುಮಿಶ್ರಿತ ಕಪ್ಪು ಬಣ್ಣದ ಗೀರುಗಳಿವೆ. ಬಲವಾದ ಚಕ್ಕ ಚುಂಚು.ಕೊಕ್ಕಿನ ಬುಡದಲ್ಲಿ ಉದ್ದ ಹಾಗೂ ದಬ್ಬ ಮೀಸೆ ಕೂದಲು ಇದೆ.ಕುಂಕುಮ ಬಣ್ಣದ ಚಿಕ್ಕ ಕಾಲು. ದಪ್ಪ ಗಿಡ್ಡ ಚೊಟುದ್ದದ ಬಾಲ ಹಾರುವಾಗ ತ್ರಿಕೋನಾಕಾರದಲ್ಲಿ ಕಾಣುವುದು.ನಾಲ್ಕಾರು ಹಕ್ಕಿಗಳು ಗುಂಪಾಗಿ,ಆಲ ಬಸುರಿ, ಗೋಣಿ, ಹಣ್ಣಾದಾಗ ಕಾಣುವುದು. ಗಂಡು ಹೆಣ್ಣು ಒಂದೇರೀತಿ ಇರುವುದು. ಮೊದಲು ನನಗೆ ಕಾಣಿಸಿದ್ದು ಮುಂಜಾನೆ ರಸ್ತೆ ಪಕ್ಕದ ಮಾವಿನ ಮರದ ತುದಿಯಲ್ಲಿ ಜೋಡಿಹಕ್ಕಿ.ಅನಂತರ ಒಂದು  ವರುಷದ ನಂತರ ಮೂರೂರಿನ ತೊಂಡೆಕೆರೆ ಹತ್ತಿರ ಆಲದಮರದಲ್ಲಿ ಹಣ್ಣಾದಾಗ. ಇದರ ಕೂಗು ತಾಮ್ರದ ಮೇಲೆ ಸುತ್ತಿಗೆಯಿಂದ ಬಡಿದಾಗ ಬರುವ ಸದ್ದಿನಂತಿದೆ ಹಾಗಾಗಿ ಇದಕ್ಕೆ ಇಂಗ್ಲೀಷ ನಲ್ಲಿ 'ಕೊಪ್ಪರ್ಸ್ಮಿತ್ ಬಾರ್ಬೆಟ್ ' ಎಂದು ಇದರ ಕೂಗನ್ನು ಆದರಿಸಿ ಹೆಸರು ನೀಡಿದೆ. ಟೊಯಕ್ ಟೊಯಕ್ ಎಂದು ದಿನವಿಡೀ ಒಂದೇಸವನೆ ಕೂಗುವುದು.
ಜನವರಿಯಿಂದ-ಜೂನ್ ಅವಧಿಯಲ್ಲಿ ಒಣಗಿದ  ಅಥವಾ ಹಸಿಯಾದ ಆಲ, ಬಸುರಿ, ನುಗ್ಗೆ, ಗೊರುಕಲು, ಮಾವು ಮುಂತಾದ ಭೂಮಿಗೆ ಸಮಾನಾಂತರವಾಗಿರುವ ಟೊಂಗೆಗಳಲ್ಲಿ ಸಾಧಾರಣ ಎತ್ತರದಲ್ಲಿ ಒಟ್ಟೆ ಕೊರೆದು ಅಲ್ಲಿ ಗೂಡು ಮಾಡಿಕೊಳ್ಳುವುದು.
ಟೊಂಗೆಯ ಅಡಿಬದಿಗೆ  ಒಟ್ಟೆ ಇರುವದು.

ಅಂತ್ರವಳ್ಳಿ- ಕುಮಟಾ ಸಿರಸಿ  ರಸ್ತೆಯಲ್ಲಿ ಮುಖ್ಯ ರಸ್ತೆಯಿಂದ 1 ಕಿ.ಮೀ ಮೂರದಲ್ಲಿ ಮನೆಯ ಹಿಂಭಾದಲ್ಲಿ ತೆಗೆದ ಫೋಟೋ. ರಾತ್ರಿ ಬೆಟರಿ ಬಿಟ್ಟಾಗ ಮುಂದೆ ಬಾಗಿಲಿಗೆ ಬರುವುದು, ಈ ತಂತ್ರ ಬಳಸಿ ಫೋಟೋ ವಿಡಿಯೋ ಮಾಡಿದೆ.

ಪೊಟರೆ ಮುಂದೆ ಸಾಗಿದಂತೆ ಕೆಳಮುಖವಾಗಿದೆ. ಬಾಗಿಲಿಗೆ ಬರದಿದ್ದಾಗ ಹಕ್ಕಿ ಕಾಣಿಸುವುದಿಲ್ಲ.

ಮಾವಿನ ಟೊಂಗೆಯಲ್ಲಿ ಕೊರೆದ ಗೂಡು , ಚುಂಚಿನ ಬುಡದಲ್ಲಿ ಕಾಣುವ ದಪ್ಪ ಹಾಗೂ ಉದ್ದದ ಮೀಸೆ ಕೂದಲನ್ನು ಕಾಣಬಹುದು.
         ನನಗೆ ಅಂತ್ರವಳ್ಳಿಯಲ್ಲಿ ಸಿಕ್ಕ ಗೂಡು ಸುಮಾರು 10 ಫೂಟ್ ಎತ್ತರದಲ್ಲಿ ಮಾವಿನ ಟೊಂಗೆಯಲ್ಲಿತ್ತು. ಮನೆಯ ಸಮೀಪದ ಮಾವಿನಮರದಲ್ಲಿ ಇದು ವಾಸ್ತವ್ಯ ಹೂಡಿತ್ತು. ಗೂಡು ಎರಡೂವರೆ ಇಂಚು ಗೋಲಾವಾಗಿತ್ತು. ರಾತ್ರಿ ಟಾರ್ಚ ಬಿಟ್ಟಾಗ ಹೊರಕ್ಕೆ ಇಣುಕಿಬರುತ್ತಿತ್ತು.ನನ್ನ ಫೋಟೋಗಳು ವೀಡಿಯೋಗಳು ಈ ಟಾರ್ಚ ಬೆಳಕಿನಲ್ಲಿ  ಮಾಡದ್ದು. ಇದು ಸಾಮಾನ್ಯವಾಗಿ ಹೊಳಪಿಲ್ಲದ ಬಿಳಿ ಬಣ್ಣದ 3 ಮೊಟ್ಟೆ ಇಡುವುದು. ಗಂಡು ಹೆಣ್ಣು ಎರಡೂ ಮರಿಗಳ ಪೋಷಣೆಯಲ್ಲಿ ಪಾಲ್ಗೊಳ್ಳುವುದು.

        ಭಾರತ, ಬಾಂಗ್ಲಾದೇಶ. ಪಾಕಿಸ್ಥಾನ, ಬರಮಾ ಆಗ್ನೇಯ ಏಷಿಯಾದ ಎಲ್ಲಾ ದೇಷಗಳಲ್ಲಿ ಇದೆ. ಇದು ಹೆಚ್ಚಾಗಿ ನೆಲಕ್ಕೆ ಇಳಿಯುವುದೇ ಇಲ್ಲ. ಹಾರುವ ರೆಕ್ಕೆ ಕೀಟಗಳು, ನುಸಿ , ಇದರ ಪ್ರಿಯಾಹಾರ. ಮಾವಿನ ಮರದ ಹತ್ತಿರ ಇಂತಹ ನುಸಿ ಹೆಚ್ಚಾಗಿರುವುದರಿಂದ  ಇದು ಅಲ್ಲಿ ಬೀಡುಬಿಡುವುದು. ಈ ಕೀಟಗಳನ್ನು ತಿಂದು ಮಾವು ಬೆಳೆಗೆ ಬರುವ ಎಷ್ಟೋ ರೋಗಗಳನ್ನು ತಡೆಯುವುದು. ಹಾಗಾಗಿ ಮಾವು ಬೆಳೆಗಾರರ ಮಿತ್ರ ಈ ಹಕ್ಕಿ.